Pas një nate relativisht të qetë, autoritetet franceze njoftojnë se situata me zjarret masive në departamentin Gironde, në jugperëndim të Francës, është stabilizuar, megjithëse rreziku mbetet i lartë për shkak të valës së re të të nxehtit.

Sipas autoriteteve, flakët janë vënë nën kontroll në disa zona falë punës së mijëra zjarrfikësve dhe kushteve më të favorshme gjatë natës. Megjithatë, parashikimet për temperatura që pritet të arrijnë deri në 41 gradë Celsius dhe erërat e forta gjatë ditës mund të favorizojnë riaktivizimin e vatrave të zjarrit.

Zjarri në Gironde ka shkatërruar dhjetëra mijëra hektarë pyje dhe ka detyruar evakuimin e qindra mijëra banorëve dhe turistëve. Autoritetet kanë paralajmëruar se situata mbetet kritike, ndërsa ekipet e emergjencës vijojnë punën për të krijuar barriera mbrojtëse dhe për të parandaluar përhapjen e flakëve drejt zonave të banuara.

Presidenti francez Emmanuel Macron e ka cilësuar krizën si një nga më të rëndat që ka përjetuar vendi në dekadat e fundit, ndërsa autoritetet u bëjnë thirrje qytetarëve të respektojnë urdhrat e evakuimit dhe masat e sigurisë deri në përmirësimin e plotë të situatës.