Zbardhen detaje të reja nga ngjarja e ndodhur pasditen e së shtunës në Milot, ku u qëllua me armë zjarri në drejtim të një automjeti që ishte në lëvizje.

Sipas hetimeve paraprake, rreth orës 18:00, në afërsi të Urës së Milotit, shtetasi Gj. Gj., i cili lëvizte me një automjet tip “Audi”, dyshohet se ka ndjekur nga pas automjetin tip “Audi”, që drejtohej nga shtetasi M. J., 30 vjeç, banues në Rubik. Në ecje, autori i dyshuar ka qëlluar disa herë me armë zjarri në drejtim të automjetit të 30-vjeçarit, pa shkaktuar të lënduar.

Burime pranë grupit hetimor bëjnë me dije se pista kryesore ku janë përqendruar hetimet lidhet me një konflikt familjar. Dyshohet se shkak i ngjarjes është bërë divorci i 30-vjeçarit me motrën e autorit të dyshuar, çka mund të ketë sjellë përshkallëzimin e konfliktit.

Pas të shtënave, autori është larguar nga vendi i ngjarjes, ndërsa shërbimet e Policisë vijojnë operacionin për kapjen e tij.

Nën drejtimin e Prokurorisë, grupi hetimor po punon për dokumentimin e plotë të ngjarjes dhe verifikimin e motivit, i cili deri në këtë fazë mbetet në nivel dyshimi.

/rtsh.al/