Një rrjet i gjerë organizatash profesionale, përfshirë Shoqatën e Agjentëve të FBI-së dhe ish-zyrtarë të lartë të Departamentit të Drejtësisë, ka dalë hapur në mbështetje të tre agjentëve të byrosë të shkarkuar nga puna vitin e kaluar. Padia e ngritur nga ish-zyrtarët vë në shënjestër valën e pushimeve nga puna të ndërmarra nën drejtimin e Drejtorit të FBI-së, Kash Patel, pas roleve që agjentët patën në hetimet lidhur me përpjekjet e Presidentit Donald Trump për anulimin e zgjedhjeve të vitit 2020.

Gjatë javës së kaluar, në gjykatë janë paraqitur pesë dokumente mbështetëse (amici curiae) nga palë të jashtme, të cilat denoncojnë spastrimet e brendshme dhe i cilësojnë ato si një cenim të drejtpërdrejtë të pavarësisë së institucionit.

Mbrojtja e karrierës apolitike dhe të drejtave kushtetuese

Dokumentet ligjore të paraqitura nga Shoqata e Agjentëve të FBI-së, e cila përfaqëson gati 12,000 anëtarë, argumentojnë se shkarkimet ishin të paligjshme, pasi punonjësve iu mohua e drejta për një proces të rregullt ligjor dhe u ndëshkuan mbi baza të perceptimit politik. Sipas shoqatës, ky precedent rrezikon funksionimin e vetë byrosë.

“Byroja thjesht nuk mund të funksionojë nëse Agjentët Specialë individualë duhet të zgjedhin nëse do të pranojnë një detyrë të ligjshme që më vonë mund t’i shkarkojë nga puna, ose, si alternativë, ta refuzojnë atë dhe t’i nënshtrohen shkarkimit për mosbindje. Agjentët Specialë të FBI-së e kanë kuptuar prej kohësh se ata janë subjekt i caktimit dhe ricaktimit në çdo kohë bazuar në nevojat e Byrosë.”, tha Shoqata e Agjentëve të FBI-së

Paralelisht, ish-zyrtarë të lartë të Departamentit të Drejtësisë kanë ngritur shqetësimin se ky spastrim minon standardet pesëdhjetëvjeçare të pavarësisë së zbatimit të ligjit në SHBA.

“Duke lënë mënjanë shkeljen që rezulton nga të drejtat e Paditësve, ndikimi i pashmangshëm i këtij ‘spastrimi’ do të jetë dobësimi i pavarësisë së agjentëve, avokatëve, analistëve dhe stafit tjetër të karrierës së mbetur dhe të ardhshëm në FBI, DOJ dhe agjenci të tjera të zbatimit të ligjit, të cilët tani duhet të veprojnë me mirëkuptimin se gjykimet e tyre hetimore dhe të zbatimit të ligjit, për herë të parë në karrierën e tyre, mund të vlerësohen përmes një lente politike partiake.”, thanë ish-zyrtarë të lartë të Departamentit të Drejtësisë.

Prapaskenat e përplasjes ligjore dhe reagimi i administratës

Tri agjentet e përfshira në padi — Michelle Ball, Jamie Garman dhe Blaire Toleman — pretendojnë se u bënë viktimë e një fushate hakmarrëse për shkak të punës së tyre në kuadër të hetimit të udhëhequr nga këshilltari special Jack Smith. Ky hetim çoi fillimisht në ngritjen e akuzave ndaj Donald Trump për përpjekje të përmbysjes së rezultatit zgjedhor, por çështja u braktis më vonë nga Smith pasi Trump fitoi zgjedhjet presidenciale në vitin 2024, në përputhje me udhëzimet e Departamentit të Drejtësisë që mbrojnë presidentët në detyrë nga ndjekja penale federale.

Nga ana tjetër, Drejtori i FBI-së, Kash Patel, dhe ish-Prokurorja e Përgjithshme, Pam Bondi, i kanë mbrojtur shkarkimet duke pretenduar se ekipi i hetuesve kishte përdorur zbatimin e ligjit federal si “armë politike”. Ky pretendim është hedhur poshtë nga paditëset, të cilat e cilësojnë atë si të pabazë dhe shpifës, duke theksuar se shërbimi i tyre në byro ka qenë i patëmetë.

Dosjes gjyqësore i janë bashkuar gjithashtu grupe si Studiuesit e Amendamentit të Parë, Avokatët për Sundimin e Ligjit dhe Lidhja e Drejtësisë, kjo e fundit duke paralajmëruar për rreziqet e politizimit të institucioneve të sigurisë.

“Kushtetuta është hartuar për të parandaluar pikërisht këtë lloj abuzimi.”, tha Lidhja e Drejtësisë.

/rtsh.al/