Policia vijon hetimet për zbardhjen e grabitjes së argjendarisë në Paskuqan, ngjarje e ndodhur të mërkurën (5 gusht). Sipas burimeve nga grupi hetimor, dy autorët, të cilët ishin të maskuar, kanë ndjekur të njëjtin itinerar si gjatë mbërritjes në vendngjarje, ashtu edhe pas largimit.

Nga këqyrja e kamerave të sigurisë ka rezultuar se autorët kanë lëvizur nëpër rrugicat periferike të Kamzës, duke shmangur rrugët kryesore, një itinerar që, sipas hetuesve, tregon se ata e njihnin mirë zonën.

Burimet bëjnë me dije se autorët kanë marrë vetëm sende floriri, me një vlerë që dyshohet se i kalon 1.5 milionë lekë. Hetuesit dyshojnë se grabitja ka qenë e mirëorganizuar dhe se autorët kishin informacion të saktë për vendndodhjen e bizhuterive me vlerë brenda argjendarisë. Dyshohet që njëri prej autorëve është paraqitur si klient disa ditë përpara grabitjes, me qëllim vëzhgimin e ambienteve dhe identifikimin e sendeve me vlerë.

Grupi hetimor nuk përjashton mundësinë që dy autorët të kenë pasur edhe bashkëpunëtorë të tjerë, ndërsa nga verifikimet e deritanishme rezulton se ata nuk janë të njëjtët persona të përfshirë në grabitjen e një argjendarie tjetër në Kamëz më 16 maj, pasi autorët e asaj ngjarjeje janë arrestuar.

/rtsh.al/