Një valë dronësh ukrainasë ka shënjestruar gjatë natës një qendër masive logjistike jashtë Moskës, duke lënë në flakë një nga depot më të mëdha të shitjes me pakicë në Rusi. Të nesërmen në mëngjes, pa përfunduar mirë operacioni i natës, ekipet ushtarake ukrainase nisën menjëherë përgatitjet për goditjen e radhës.

Në një fushë me luledielli në jug të Ukrainës, ushtarët e Regjimentit të 413-të të Sistemeve Pa Pilot “Sulm” mblodhën rreth 20 dronë të vegjël të ngarkuar me eksplozivë për t’i nisur në drejtim të objektivave ruse. Ky operacion u vëzhgua nga një ekip gazetarësh të Associated Press, duke ofruar një pamje të rrallë mbi këtë strategji që po zgjerohet me shpejtësi.

Kjo taktikë e re e Kievit bazohet në përdorimin e dronëve me rreze të gjatë veprimi, të cilët janë projektuar për të goditur objekte ushtarake, industriale dhe logjistike larg vijës së frontit. Përveç objekteve strategjike ushtarake dhe energjetike, Kievi ka shënjestruar gjithnjë e më shumë depot gjigante të kompanisë “Wildberries”, duke shkaktuar dëme miliarda dollarësh për gjigantin rus të shitjes online.

Ndikimi strategjik dhe psikologjik

Fushata e sulmeve ajrore synon t’i sjellë pasojat e luftës direkt te publiku rus dhe të rrisë presionin mbi Presidentin Vladimir Putin për të negociuar një zgjidhje paqeje. Komandanti i regjimentit, 38-vjeçari Yevhen Karas, konfirmoi se njësia e tij mori pjesë në sulmin ndaj depos në jug të Moskës. Ai u shpreh se “sa më të mëdha viktimat që kanë, aq më shpejt do të shikojnë për paqe”, duke shtuar se Ukraina duhet ta ndëshkojë Kremlinin “nëse duam të kemi një periudhë të qëndrueshme dhe të gjatë paqeje, si dhe paqe normale”.

Shkalla e gjerë e këtyre goditjeve e ka detyruar ushtrinë ruse të shtrijë sistemet e mbrojtjes ajrore në territore më të mëdha, duke krijuar ndërprerje në aeroporte, mungesa karburanti dhe luhatje në moralin e popullsisë. Karas beson se ndikimi ekonomik do t’u tregojë qytetarëve të zakonshëm rusë koston reale të luftës.

Përveç objektivave ushtarake, komandanti theksoi edhe aspektin moral të reciprocitetit në këtë përplasje, duke nëvizuar se “banorët e Moskës duhet të kalojnë netët në metronë e tyre të mrekullueshme, ashtu si banorët e Kievit kanë kaluar vite duke qëndruar në fshehtësi për t’i shpëtuar sulmeve me raketa dhe dronë rusë”.

Profilizimi i njësisë

I diplomuar për filozofi, Karas u regjistrua si vullnetar ditën e parë të pushtimit më 24 shkurt 2022, ku më pas humbi edhe vëllain në mbrojtje të rajonit të Kievit. Në vitin 2024, ai u caktua në krye të Regjimentit të 413-të, i cili përbëhet nga profile nga më të ndryshmet — përfshirë një ish-këngëtar opere, një programues, një reper dhe një violonçelist.

Nga përdorimi i mjeteve për zbulim, njësia tashmë organizon operacione me rreze të gjatë duke përdorur dronët e prodhuar në vend, FP-1, të cilët mund të fluturojnë mbi një mijë milje. Sapo dronët e radhës u ngritën në ajër nga fusha e lulediellit, ushtarët mblodhën pajisjet dhe u larguan me shpejtësi drejt pikës tjetër të nisjes.

/rtsh.al/