Është vetëdorëzuar në Policinë e Shkodrës shtetasi Pjerin B., 70 vjeç, i dyshuar si autor i plagosjes me armë zjarri të fqinjit të tij, shtetasit Vladimir B., 64 vjeç. Ngjarja ndodhi pasditen e sotme, rreth orës 14:30, në lagjen “Partizani” të qytetit të Shkodrës, si pasojë e një konflikti çasti të cilësuar nga autoritetet për “motive të dobëta”.

Arrestimi dhe negociatat pas kërkimeve

Pas konfliktit, i dëmtuari Vladimir B. u transportua me urgjencë drejt Spitalit Rajonal të Shkodrës, ku ndodhet nën kujdesin mjekësor dhe jashtë rrezikut për jetën. Ndërkohë, i dyshuari u fsheh për disa orë në lagjen “Rus”, ku pas kontrolleve intensive të policisë dhe negociatave të vazhdueshme me familjarët, u bë e mundur dorëzimi i tij.

“Si rezultat i kontrolleve të shumta të kryera nga shërbimet e Policisë, pamundësisë për t’u larguar dhe për të qëndruar i fshehur, si dhe negociatave të vazhdueshme mes familjarëve të autorit të dyshuar dhe Policisë, shtetasi P. B. u vetëdorëzua te strukturat e Policisë,” njoftoi zyrtarisht Policia e Shkodrës.

Procedimi penal dhe akuzat zyrtare

Në përfundim të veprimeve të para procedurale, strukturat e policisë bënë arrestimin e 70-vjeçarit, ndërsa materialet i kaluan Prokurorisë pranë Gjykatës së Shkallës së Parë Shkodër për hetime të mëtejshme.

“Në përfundim të veprimeve procedurale, 70-vjeçari u arrestua për veprat penale ‘Vrasja me dashje’, mbetur në tentativë, dhe ‘Mbajtja pa leje dhe prodhimi i armëve, armëve shpërthyese dhe i municionit’,” konfirmon njoftimi zyrtar i policisë.

Grupi hetimor po vijon punën e plotë nën drejtimin e Prokurorisë për dokumentimin e të gjitha rrethanave ligjore të këtij incidenti.

/rtsh.al/