Të paktën 384 udhëtarë janë raportuar të zhdukur pas përmbytjeve masive që kanë goditur Nepalin. Mes personave të zhdukur janë 291 shtetas të huaj dhe 93 shtetas nepalezë, sipas një vlerësimi paraprak të publikuar nga Bordi i Turizmit i Nepalit.

“Një regjistër paraprak i agjencive të marra nga kompanitë e turizmit dhe udhëtimit ka identifikuar 384 udhëtarë, përfshirë 291 shtetas të huaj dhe 93 shtetas nepalezë, të cilët u raportuan të zhdukur nga zonat e prekura”, njoftoi Bordi i Turizmit në një deklaratë.

Në listën paraprake janë përfshirë shtetas nga disa vende, mes tyre India, Australia, Holanda, Afrika e Jugut, Mbretëria e Bashkuar dhe Malajzia.

Autoritetet kanë theksuar se bëhet fjalë për të dhëna fillestare dhe se numri i personave të raportuar të zhdukur mund të ndryshojë gjatë verifikimit të informacionit.

Bordi i Turizmit po bashkëpunon me agjencitë turistike, guidat, autoritetet lokale dhe strukturat e sigurisë për të konfirmuar identitetin dhe vendndodhjen e personave të përfshirë në listë.

Verifikimet vijojnë në terren, ndërsa autoritetet po përpiqen të përcaktojnë përmasat e plota të dëmeve dhe pasojave të shkaktuara nga përmbytjet.

/rtsh.al/