Porti i Sarandës vijon të jetë një nga portat kryesore hyrëse për turistët e huaj gjatë sezonit veror. Rreth 500 vizitorë të huaj mbërritën këtë të mërkurë në terminalin e portit, me kruazierën “Seabourn Quest”.

Turistët, të kombësive të ndryshme, mes tyre francezë, belgë, kroatë, bullgarë, si edhe vizitorë nga Hondurasi e Zimbabve, u bënë pjesë e një guide disaorëshe në jug të vendit.

Gjatë qëndrimit në Sarandë, ata vizituan qytetin, Ksamilin, Parkun Kombëtar të Butrintit si dhe Parkun Natyror të Syrit të Kaltër.

“Seabourn Quest” mbërriti në Gjirin e Sarandës si pjesë e itinerarit të saj mesdhetar, i cili më 26 gusht nisi nga porti i Brindizit në Itali. Kjo ishte hera e pestë që kruaziera përfshiu Sarandën në itinerarin e saj.

Sipas burimeve portuale, qëndrimi i anijes në Sarandë ishte disaorësh dhe ajo pritet të largohet pasditen e kësaj të mërkure, me destinacion brigjet e Zakinthos në Greqi.

Me mbërritjen e “Seabourn Quest”, numri i anijeve turistike që kanë prekur Sarandën këtë sezon shkon në 47, ndërsa 19 prej tyre janë të kategorisë së kruazierave.

/rtsh.al/