“Dropull International Short Film Festival”, në edicionin e gjashtë  të tij erdhi me 20 filma konkurues, të moshave të ndryshme ,prodhime kinematografike nga Shqipëria, Kosova dhe Greqia.

Këtë vit ky event u shtri mes Dropullit dhe qytetit të gurtë përgjatë pesë ditëve me shfaqjen e tyre në ekranin e madh të kinemave.

“Temat janë tema e jetës, tema e dashurisë, tema e mbijetesës, tema e minoritetit, të cilët të mos jenë më indiferentë, të jenë njësoj në shoqëri me gjithë të tjerët. Janë tema interesante. Filmat janë të moshave të ndryshme. Kemi edhe për fëmijë deri në 14 vjeç, por kemi dhe filma për moshën tonë, adulte”, tha Kleanthi Zhonga, nëndrejtoresha e festivalit.

Pjesëmarrësit e kanë vlerësuar këtë festival si një mënyrë të mirë për të diskutuar  rreth bashkëpunimit  kinematografik rajonal si dhe forcimin e tij në të ardhmen.

“Mendoj se ky është një festival i rëndësishëm për rajonin, sepse vendos ura bashkëpunimi në fushën e kinematografisë midis Shqipërisë, Kosovës dhe Greqisë. Gjithashtu, është një mundësi e mirë për komunitetin lokal që të vijë në kinema për të ndjekur filma të regjisorëve nga vende të ndryshme. Në këtë mënyrë diskutohet për bashkëpunimin kinematografik rajonal, si dhe forcimin e tij në të ardhmen”.

Filmi më i mirë i festivalit u shpall “Kaosi” i regjisorit grek Nikos Kolioukos.

Pjesë e programit të festivalit ishte dhe organizimi i workshopeve për filmin,animacionin,pikturën, me pjesëmarrjen e artdashësve të moshave të ndryshme.

/rtsh.al/