Një nga koleksionet më të rëndësishme të arit të Epokës së Bronzit në Evropë është grabitur në Spanjë. Thesari i Villena-s, i përbërë nga 66 artefakte, kryesisht prej ari, u vodh nga muzeu me të njëjtin emër në një operacion që zgjati vetëm rreth katër minuta.

Alarmi në muze u aktivizua rreth orës 05:20 të mëngjesit, ndërsa autorët u larguan nga ndërtesa vetëm katër minuta më vonë. Sipas autoriteteve, grabitja ishte e shpejtë dhe profesionale.

Hajdutët dyshohet se hynë në muze përmes një dritareje dhe morën pjesën më të madhe të koleksionit. Mes objekteve të lëna pas ishin disa enë argjendi, një byzylyk dhe pjesë të një shkopi ceremonial parahistorik.

Thesari u zbulua në vitin 1963 nga arkeologu José María Soler dhe daton rreth vitit 1000 p.e.s. Koleksioni përfshin dhjetëra byzylykë, tasa, shishe dhe objekte të tjera të rralla.

Edhe pse vlera e tij arkeologjike dhe historike konsiderohet e paçmueshme, vetëm ari i koleksionit vlerësohet në rreth 1.7 milionë euro.

Autoritetet po hetojnë gjithashtu një alarm të regjistruar pak para grabitjes në një qendër sportive pranë muzeut, duke dyshuar se mund të ketë qenë pjesë e një skeme shpërqendrimi.

Ekspertët e arkeologjisë e kanë cilësuar grabitjen si të mirëplanifikuar, ndërsa policia vijon hetimet për identifikimin dhe kapjen e autorëve.

/rtsh.al/