Bashkia Shkodër, në bashkëpunim me Bordin e Kullimit, po vijon punën për pastrimin e plotë të kanalit kryesor kullues në zonën e Nënshkodrës, me një gjatësi prej 9.7 kilometrash.

Ndërhyrja synon përmirësimin e funksionimit të të gjithë rrjetit kullues në zonat e Dajçit dhe Trushit, duke mundësuar largimin më të shpejtë të ujërave dhe reduktuar rrezikun e përmbytjeve.

“Po bëjmë një ndërhyrje në kanalin e gjashtë, i cili përfshin pothuajse të gjithë zonën e fushës së Trushit, të Dajçit dhe të gjithë zonën në Shkodër. Është një fakt që, pas punimeve që ne kemi kryer në kanalet e dyta dhe të treta, kjo ndërhyrje në kanalet e para, në bashkëpunim me Bordin Rajonal të Lezhës, po e bën jashtëzakonisht funksionale skemën e kullimit. Kuptohet, kjo është një përkujdesje që Bashkia Shkodër, nëpërmjet këtij bashkëpunimi, po bën në shërbim të fermerëve, duke dalë përpara problematikave që mund të sjellin reshjet e muajve të ardhshëm. Në të gjithë fushën e Nënshkodrës është kryer pastrimi i plotë i të gjithë skemës së kullimit”, u shpreh Muhamet Muça, Përgjegjës Ndërmarrja e Shërbimeve Publike.

Pastrimi i kanalit i shërben drejtpërdrejt mbrojtjes së tokave bujqësore, përmirësimit të kushteve për fermerët dhe banorët, si dhe rritjes së kapacitetit kullues në të gjithë zonën.

Gazetare: M. Gjoni

/rtsh.al/