Tekstet shkollore për vitin e ri arsimor 2026-2027 kanë mbërritur në Gjirokastër dhe së shpejti do të nisin të shpërndahen në të gjitha institucionet arsimore.

Një ndër risitë e këtij viti është përfshirja e kurrikulave të reja për klasat e para, të gjashta dhe të dhjeta.

“Për vitin e ri shkollor janë marrë të gjitha masat dhe drejtoritë e shkollave kanë komunikuar me distributorët.

Të gjitha tekstet pothuajse kanë mbërritur pranë distributorëve dhe janë gati për t’u shpërndarë nëpër shkolla. Këtë vit shkollor tekstet nga klasa e parë deri në klasën e pestë janë të reja dhe falas, ndërsa nga klasa e gjashtë deri në klasën e nëntë janë në përdorim. Gjithashtu, për shtresat e margjinalizuara që plotësojnë kritere të ndryshme, tekstet janë falas deri në klasën e 12-të”, shprehet Etleva Yzo  Drejtoreshë e Zyrës Vendore Arsimore Gjirokastër-Libohovë.

Në fokus të procesit mbetet edhe organizimi i shpërndarjes, në mënyrë që çdo shkollë të jetë e pajisur me tekstet përkatëse përpara nisjes së mësimit.

“Po shpërndahen sipas shkollave. Normalisht shkollat fillojnë diku, mësueset fillojnë diku tek 1 shtatori. Ne atëherë do të jemi gati për t’i çuar shkollë më shkollë librat, jo më shumë se katër ditë. Domethënë, brenda datës 5 çdo shkollë do të ketë librat pranë”, thekson Zia Mahmutaj, përgjegjës për shpërndarjen e teksteve.

Sipas të dhënave të Zyrës Vendore Arsimore Gjirokastër-Libohovë, rreth 3000 nxënës pritet të nisin vitin e ri shkollor 2026-2027 në institucionet arsimore të zonës.

Me përfundimin e shpërndarjes së teksteve, shkollat i drejtohen tashmë përgatitjeve të fundit për të pritur nxënësit në ditën e parë të mësimit.

Gazetare: L. Koçiu

/rtsh.al/