Franca dhe Suedia kanë nënshkruar një marrëveshje strategjike prej 4.3 miliardë eurosh ($5 miliardë), sipas së cilës Parisi do të furnizojë vendin nordik me katër fregata moderne luftarake. Kontrata u finalizua gjatë vizitës së Presidentit francez Emmanuel Macron në Suedi, në kuadër të përpjekjeve për të forcuar mbrojtjen e aleatit më të ri të NATO-s në rajonin e Detit Baltik.

Marrëveshja u nënshkrua në bordin e anijes Amiral Ronarc’h – fregata e parë e gjeneratës së re të prodhuar nga kompania franceze Naval Group. Sipas planit, anija e parë për marinën suedeze pritet të dorëzohet në vitin 2030.

Kapacitetet e avancuara dhe autonomia evropiane

Fregatat e reja do të shërbejnë si platforma të fuqishme detare me rreze të gjatë veprimi, të pajisura me interceptorë të mbrojtjes ajrore për rrëzimin e raketa balistike, si dhe me torpedo dhe raketa lundrimi me rreze të gjatë.

Kryeministri suedez Ulf Kristersson vlerësoi rëndësinë e këtij bashkëpunimi, duke theksuar se lufta në Ukrainë ka dëshmuar nevojën urgjente për mbrojtje efektive ndaj raketave. Nga ana e tij, Presidenti Macron theksoi se ky hap konsolidon bazën industriale dhe teknologjike të mbrojtjes evropiane, duke synuar njëkohësisht zvogëlimin e varësisë së kontinentit nga Shtetet e Bashkuara, në një kohë kur Uashingtoni po zhvendos fokusin drejt rajonit Indo-Paqësor.

Përfshirja në parandalimin bërthamor dhe bashkëpunimi i ndërsjellë

Gjatë bisedimeve dypalëshe, palët diskutuan gjithashtu mbi mundësinë e pjesëmarrjes së Suedisë në iniciativën e re të Francës për të koordinuar përpjekjet e parandalimit bërthamor me aleatët evropianë – një nismë që ka tërhequr tashmë interesin e disa vendeve të tjera si Britania, Gjermania, Polonia dhe Norvegjia.

Ky partneritet ushtarak është i dyanshëm; në muajin dhjetor të vitit të kaluar, Franca bleu gjithashtu dy avionë mbikëqyrës të avancuar GlobalEye nga prodhuesi suedez Saab.

Suedia u anëtarësua zyrtarisht në NATO në vitin 2024, duke u bërë anëtari i 32-të i aleancës dhe duke i dhënë fund dekadave të neutralitetit, si pasojë e përkeqësimit të situatës së sigurisë në Evropë pas agresionit rus në Ukrainë.

/rtsh.al/