Hetuesit gjermanë kanë arritur të identifikojnë dy persona të dyshuar si përgjegjës për sulmin me dron të mbetur në tentativë, i cili synoi një avion transporti ukrainas në aeroportin e Leipzig/Halle në fillim të muajit gusht. Ngjarja ka shkaktuar një reagim të ashpër zinxhir në rrafshin diplomatik evropian, duke çuar në mbylljen e përfaqësive ruse në Gjermani dhe në thirrje për sanksione të reja nga Bashkimi Evropian.

Sipas informacioneve të bëra publike nga mediat gjermane, përfshirë “Süddeutsche Zeitung”, i dyshuari i parë është një shtetas me origjinë ruse, i cili mban pasaportë letoneze. Ky individ dyshohet të ketë pasur një rol kyç në planifikimin e sulmit dhe, sipas burimeve inteligjente, ka lidhje me shërbimet sekrete ruse. I dyshuari i dytë është një shtetas nga Bjellorusia i pajisur me pasaportë ruse, i cili raportohet të ketë hyrë në zonën Shengen përmes një vize të lëshuar nga Italia.

Reagimet dhe masat e Gjermanisë

Autoritetet në Berlin e kanë cilësuar ngjarjen si një “sulm hibrid” të orkestruar nga Rusia. Si kundërpërgjigje, Gjermania ka njoftuar mbylljen e konsullatës së përgjithshme ruse në Bon, si dhe ndërprerjen e kontratës për “Shtëpinë Ruse” në Berlin, një qendër kulturore e dyshuar për aktivitete spiunazhi.

Gjatë hetimeve në aeroport, zyrtarët zbuluan një dron të pajisur me eksploziv dhe një mekanizëm shpërthimi në afërsi të avionit ukrainas të mallrave. Lidhur me natyrën e sulmit, Ministri i Brendshëm gjerman, Alexander Dobrindt, theksoi se pajisjet kërkonin “një shkallë të lartë ekspertize teknike”, por plani duket se është zbatuar nga agjentë “të nivelit të ulët”.

Reagimi i Moskës

Rusia ka mohuar kategorikisht çdo përfshirje në këtë incident. Të mërkurën, Ministria e Jashtme ruse thirri ambasadorin gjerman për të protestuar ndaj atyre që i konsideron si veprime anti-ruse. Ndërkohë, Presidenti rus Vladimir Putin i ka cilësuar masat ndëshkuese të Berlinit si një “gabim serioz”.

Qëndrimi i BE-së dhe hetimi mbi vizën italiane

Kjo ngjarje ka ngritur alarmin në strukturat e larta të Bashkimit Evropian dhe NATO-s. Përfaqësuesja e Lartë e BE-së për Politikën e Jashtme, Kaja Kallas, e cilësoi incidentin si një akt me “të gjitha shenjat dalluese të terrorizmit të sponsorizuar nga shteti”, duke bërë me dije se po punohet për një paketë sanksionesh që do të synojë 1,600 individë dhe subjekte të lidhura me industrinë ushtarake ruse.

Nga ana e tij, Ministri i Jashtëm gjerman, Johann Wadephul, paralajmëroi pasoja të drejtpërdrejta: “Rusia ka përshkallëzuar situatën dhe duhet të jetojë me pasojat. Presioni ndaj Rusisë po rritet dhe mbështetja për Ukrainën mbetet gjithashtu në një nivel të lartë.”

Në Itali, autoritetet kanë nisur verifikimet lidhur me vizën Shengen të përdorur nga i dyshuari bjellorus. Ministri i Jashtëm italian, Antonio Tajani, u shpreh gjatë takimit të Gymnich: “Do ta verifikojmë. Ekziston një proces për dhënien e vizave, sepse duhet të përmbushen disa kërkesa. Nëse njerëzit i plotësojnë ato dhe nuk ka asnjë ‘alarm’ për individët, viza jepet. Nëse është kështu, do të përpiqemi të kuptojmë pse u dha ajo vizë.”

Incidenti në Leipzig konsiderohet si një provë e re e tensioneve të larta mes Perëndimit dhe Moskës, ndërsa institucionet evropiane po rishikojnë politikat e tyre të sigurisë dhe lëvizjes së lirë për të parandaluar akte të ngjashme në të ardhmen. DW/ ANSA

/rtsh.al/