Ministri për Evropën dhe Punët e Jashtme, Ferit Hoxha, ka reaguar me një postim në platformën “X” lidhur me sulmet e fundit të Rusisë ndaj Ukrainës dhe incidentin e konfirmuar të një droni rus në Leipzig.

“Rusia ka demonstruar edhe një herë se agresioni i saj kundër Ukrainës nuk ndalet. Sulmet masive në Kiev dhe qytete të tjera ukrainase, përfshirë sulmin e drejtpërdrejtë në Universitetin Kombëtar të Teknologjive Ushqimore, janë pjesë e një fushate brutale që vazhdon të vendosë civilët në rrezik,” shkruan Hoxha.

Ai thekson se Evropa dhe Shqipëria kanë qëndruar që nga dita e parë në krah të Ukrainës dhe duhet të vazhdojnë ta bëjnë këtë. “Ukraina mbetet vija e parë e kësaj lufte. Por është gjithnjë e më e qartë se shtrirja dhe ambiciet e Rusisë shtrihen shumë përtej Ukrainës,” vijon ministri.

Në reagimin e tij, Hoxha ndalet edhe te incidenti i dronit rus në Leipzig, duke e cilësuar si një kujtesë të fortë se Moska po teston kufijtë e sigurisë evropiane dhe po zgjeron aktivitetet destabilizuese në kontinent.

“Kërcënimi, agresioni dhe ndërhyrja hibride nuk do ta dobësojnë vendosmërinë e Evropës. Ato duhet të kenë efektin e kundërt: një Evropë më të fortë, më të bashkuar dhe më të vendosur. Ukraina po mbron tokën e saj. Evropa po mbron sigurinë e saj. Ne duhet të qëndrojmë së bashku në të dy frontet,” përfundon Hoxha.

Russia has once again demonstrated that its war against #Ukraine does not stop at the battlefield. Its massive attacks on #Kyiv and other Ukrainian cities, including the direct strike on the National University of Food Technologies while classes were underway, are part of a…

— Ferit Hoxha🇦🇱 (@HoxhaFer) September 2, 2026

/rtsh.al/