Një operacion i gjerë ndërkombëtar i koordinuar nga prokurorët e Drejtorisë Distriktuale Antimafia (DDA) të Romës dhe i ekzekutuar nga specialistët e Policisë Postare ka çuar në shkatërrimin e një rrjeti transnacional të dedikuar shpërndarjes së pornografisë së fëmijëve online. Operacioni u përmbyll me arrestimin e 17 personave, nga të cilët dhjetë u kapën në flagrancë në Itali dhe një në Zvicër.

Gjatë ndërhyrjes, autoritetet sekuestruan një sasi masive materialesh të paligjshme, që përfshin mbi 22,000 video, 34,000 imazhe dhe rreth 282.9 gigabajt të dhëna dixhitale. Rrjeti funksiononte si një lloj rrjeti social privat për pedofilinë, me rregulla strikte aksesi dhe hierarki të mirëmenduar.

Origjina e hetimit dhe operacioni i fshehtë

Hetimet nisën në vitin 2024, pas shkëmbimit të informacioneve me agjencinë amerikane të Hetimeve të Sigurisë Kombëtare (HSI), e cila sinjalizoi praninë në aplikacionin Telegram të një grupi privat të quajtur ‘New Saga’. Për më shumë se një vit, një oficer i Policisë Postare punoi në fshehtësi brenda këtij rrjeti, duke arritur të dokumentojë strukturën e brendshme të organizatës.

“Operacioni na lejoi të konstatojmë krijimin e një komuniteti online privat, të strukturuar dhe të organizuar, me rregulla të rrepta, të përbërë nga mbi 1,009 pjesëmarrës. Të aksesueshëm duke publikuar një lidhje të dedikuar për të tërhequr më shumë përdorues, anëtarësimi i tyre lejohej me pagesën në kriptomonedhë të shumave të vogla parash (të përcaktuara si donacione) ose ndarjen e materialeve të reja pornografike me fëmijë”, shpjegon një deklaratë e lëshuar nga Policia e Shtetit.

Struktura e brendshme dhe ekzekutimi i urdhërarresteve

Për t’i shpëtuar mbikëqyrjes nga forcat e rendit, drejtuesit e rrjetit përdornin kanale “ekskluzive” komunikimi. Një nga këto grupe mbante emrin “Salla e Mbretërve”, çka reflektonte pretendimet hierarkike të administratorëve që kontrollonin veprimtarinë kriminale.

Urdhërarrestet u ekzekutuan paralelisht në disa rajone të Italisë, përfshirë Lombardinë, Veneton, Puglian dhe Kampanjën, si dhe në territorin zviceran. Autoritetet po vijojnë punën për sqarimin e mëtejmë të të gjitha lidhjeve të këtij rrjeti.

/rtsh.al/