Ish-prodhuesi i njohur i Hollivudit, Harvey Weinstein, u dënua me 15 vjet burg për sulmin seksual të kryer në vitin 2006 ndaj ish-asistentes së prodhimit, Miriam Haley. Vendimi i dhënë nga gjykata e Nju Jorkut shënon një pikë kthese të rëndësishme në përballjen e tij ligjore nëntëvjeçare, e cila shërbeu si shkëndijë për lindjen e lëvizjes globale #MeToo.

Ky dënim vjen pas përmbysjes së vendimit të mëparshëm nga Gjykata e Apelit dhe zhvillimit të proceseve të përsëritura gjyqësore.

Hapat e ardhshëm ligjorë dhe rigjykimi në Kaliforni

Sipas raportimeve të medias specializuar Variety, Weinstein pritet të përballet me një rigjykim të dënimit të tij edhe në shtetin e Kalifornisë. Kjo çështje lidhet me akuzat për përdhunim dhe sulm seksual ndaj modeles dhe aktores italiane Evgeniya Chernyshova, ngjarje e pretenduar të ketë ndodhur në një hotel të Los Anxhelosit në vitin 2013.

Gjykatësi Curtis Farber sqaroi se u mbetet autoriteteve të shtetit të Kalifornisë për të përcaktuar nëse dënimi i ri do të vuhet njëkohësisht apo në mënyrë të njëpasnjëshme me atë të Nju Jorkut, ndërkohë që një datë e saktë për këtë proces nuk është caktuar ende.

Dëshmia e prapaskenave dhe reagimi i viktimës

Gjatë seancës gjyqësore, ish-asistentja e prodhimit, Miriam Haley, mbajti një fjalim prekës mbi ndikimin e thellë psikologjik dhe emocional që ky krim ka lënë në jetën e saj.

Ajo përshkroi procesin e mundimshëm dhe mjaft të pakëndshëm të dëshmisë në sallën e gjyqit, duke vënë në dukje pyetjet e kryqëzuara të mbrojtjes që synonin nënçmimin e figurës së saj, si dhe situatat e ngacmimit dhe kërcënimeve të vazhdueshme që ka marrë përmes rrjeteve sociale.

/rtsh.al/