Kryeministri izraelit Benjamin Netanyahu e ka mohuar sërish se shefi i inteligjencës egjiptiane, Abbas Kamel, e paralajmëroi për një sulm të mundshëm të Hamasit para 7 tetorit 2023.

Zyra e kryeministrit izraelit hodhi poshtë një raport të botuar në “The Atlantic”, sipas të cilit Kamel kishte ardhur në Izrael më pak se dy javë para pushtimit të Hamasit më 7 tetor 2023 për t’u paralajmëruar zyrtarëve izraelitë se grupi terrorist me bazë në Gaza mund të përshkallëzonte drastikisht situatën nëse nuk i jepeshin lehtësira ekonomike.

“Ky është një pretendim i rremë”, tha zyra e kryeministrit, pa specifikuar saktësisht se cilin pretendim e quan të rremë.

“Ai është mohuar tashmë në atë kohë dhe tani po riciklohet në përpjekje për të mashtruar publikun izraelit. Më 11 tetor 2023, Egjipti mohoi zyrtarisht se e kishte paralajmëruar Izraelin për sulmin e 7 tetorit”, shtoi zyra e Netanyahu-t.

Megjithatë, nuk është e qartë se për çfarë deklarate zyrtare bëhet fjalë, pasi media egjiptiane me lidhje të ngushta me shërbimet e inteligjencës së vendit kishte cituar në atë kohë burime të larta të paemërtuara të sigurisë që mohonin raportet e shtypit izraelit se ishte dhënë një paralajmërim i tillë, pa lëshuar një mohim formal qeveritar.

Siç u raportua fillimisht dy ditë pas masakrave terroriste, zyra e Netanyahu-t mohon se ai takoi apo bisedoi me Kamel-in në muajt para 7 tetorit dhe se “asnjë zyrtar i inteligjencës izraelite nuk i përcolli kryeministrit një paralajmërim të tillë”.

“Gënjeshtrat e përsëritura nuk do të bëhen kurrë të vërteta, edhe nëse përsëriten përsëri e përsëri”, deklaroi zyra e kryeministrit Netanyahu.

/rtsh.al/