Porti i Sarandës ka mirëpritur sot një tjetër anije turistike, duke konfirmuar vijimin e sezonit turistik edhe gjatë muajve të vjeshtës.

Kroçera “Oosterdam”, e kompanisë prestigjioze Holland America Line, mbërriti në qytetin bregdetar me rreth 1.900 turistë në bord.

Vizitorët kanë nisur turet e tyre në disa prej destinacioneve më të njohura të jugut të Shqipërisë.

Në programin e vizitave përfshihen Parku Kombëtar i Butrintit, Kalaja e Lëkurësit, Syri i Kaltër, Mesopotami, Karahaxhi dhe qyteti muze i Gjirokastrës.

Mbërritja e kroçerës është një tjetër tregues i interesit të lartë që turistët e huaj vazhdojnë të kenë për Sarandën dhe zonat përreth, edhe pas përfundimit të sezonit veror.

Autoritetet lokale vlerësojnë se fluksi i vizitorëve nga kroçerat po ndikon pozitivisht në ekonominë e zonës, duke gjallëruar aktivitetin e bizneseve të lidhura me turizmin, shërbimet dhe tregtinë.

Saranda, Ksamili dhe destinacionet e tjera turistike të jugut vijojnë të tërheqin vizitorë nga e gjithë bota falë kombinimit të bukurive natyrore, trashëgimisë historike e arkeologjike, kulturës vendase, mikpritjes dhe traditave shqiptare.

/rtsh.al/