Në një përshkallëzim të ri të protestave në Francë, më shumë se 250 mijë persona dolën në rrugë në 73 qytete të vendit. Sindikatat kërkojnë rritje të pagave, reforma në sistemin e taksave dhe përmirësim të kushteve në arsim për të rinjtë.

Ato kanë kundërshtuar gjithashtu kufizimet e vendosura nga policia ndaj protestave. Tubime  zhvillohen në një kohë kur ekonomia e dytë më e madhe e eurozonës po përpiqet të përmirësojë financat publike, vetëm gjashtë muaj para zgjedhjeve që do të përcaktojnë pasuesin e presidentit Emmanuel Macron, ndërsa e djathta ekstreme kryeson sondazhet.

Në Paris mbi 80 mijë persona protestuan në rrugët e kryeqytetit, ndërsa Kulla Eiffel u mbyll për vizitorët për shkak të protestave. Greva përfshiu sektorin e arsimit, hekurudhat, spitalet publike dhe shërbimet postare. Ndërkohë, qeveria angazhoi 70 mijë efektivë policie dhe forcash sigurie për të garantuar rendin, pas përplasjeve të mëparshme mes demonstruesve dhe policisë. Ministri i Brendshëm Laurent Nunez paralajmëroi një përgjigje jashtëzakonisht të vendosur ndaj çdo akti dhune apo cenimi të rendit publik.

Valë protestash pati edhe në Greqi, ku rreth 4 mijë nxënës dhe studentë u mblodhën në Athinë dhe Selanik, duke kërkuar më shumë financime për arsimin publik, modernizimin e infrastrukturës shkollore dhe mbështetje ekonomike për studentët. Protestuesit kritikuan gjithashtu rritjen e shpenzimeve ushtarake në një kohë kur arsimi përballet me mungesë fondesh.

Sipas Eurostat-it, Greqia shpenzoi në vitin 2023 vetëm 3,3 për qind të prodhimit të saj kombëtar për arsimin, kundrejt mesatares evropiane prej 4,7 për qind. Ndërkohë, Athina ka premtuar rritjen e shpenzimeve për mbrojtjen në 5 për qind të Prodhimit të Brendshëm Bruto deri në vitin 2035, në kuadër të angazhimeve të saj ndaj NATO-s.

/rtsh.al/