Stadiumi “Air Albania” do të mirëpres këtë të martë (19 nëntor) ndeshjen Shqipëri-Ukrainë në orën 20:45. Ndeshja do të zhvillohet në kuadër të turneut “UEFA Nations League” dhe në kuadër të mbarëvajtjes së këtij aktiviteti, Policia e Shtetit ka ndërmarrë një plan masash me qëllim garantimin e rendit dhe sigurisë publike.

Duke nisur nga ora 15:00 dhe deri në përfundim të ndeshjes, disa nga akset rrugore që do të bllokohen duke mos lejuar qarkullimin janë:

* Bulevardi “Dëshmorët e Kombit”, 20 m mbi urën e Dajtit; 

* Rruga “Papa Gjon Pali II”; 

* Rruga “Dervish Hima”, pranë Ambasadës së SHBA-së;

* Rruga “Asim Zeneli”, pranë Ambasadës së SHBA-së;

* Rruga “Themistokli Gërmenji”;

* Rruga “Ismail Qemali”, kryqëzimi i Liceut;

* Rruga “Mustafa Matohiti”, pranë shkollës “Kosova”;

* Rruga “Jul Variboba”, pranë postës;

* Rruga “ Lekë Dukagjini”, pranë ish-Gardës së Republikës;

* Rruga “Avdyl Frashëri”, pranë kryqëzimit të Librit Universitar.

Në zbatim të planit të masave, punonjësit e Policisë së Shtetit do të ushtrojnë kontroll të imtësishëm ndaj tifozëve, me qëllim parandalimin e futjes në stadium të banderolave me përmbajtje raciste, të fishekzjarrëve, flakadanëve, lëndëve piroteknike dhe sendeve të tjera të rrezikshme për jetën dhe shëndetin e pjesëmarrësve.

Për mbarëvajtjen e këtij aktiviteti sportiv, Policia e Shtetit ka angazhuar qindra punonjës policie, të cilët do të garantojnë rendin dhe sigurinë publike.

/rtsh.al/