Kandidati republikan për president të SHBA, Donald Trump ka thënë se nuk do të marrë pjesë në një debat tjetër kundër kandidates demokrate, Kamala Harris. Trump e bëri me dije këtë në platformën e tij “Truth Social”, ndërsa postimi vjen pasi fushata e Harris tha se ajo është gati të marrë pjesë në një debat tjetër, pas takimit të parë të tyre në një skenë debati në Filadelfia.

“Kur një boksier humbet një ndeshje, fjalët e para nga goja e tij janë: ‘Dua një revansh’”, shkroi Trump, duke e barazuar Harrisin me një boksier që ka humbur.

Ai pretendoi se sondazhet tregojnë se ai fitoi debatin, por sondazhet e parakohshme të bëra menjëherë pas kësaj treguan se votuesit mendonin se Harris performoi më fort.

Ish-presidenti shtoi se të gjitha “problemet e shkaktuara nga Kamala dhe Joe Biden” u diskutuan në detaje gjatë debatit të tij të parë kundër Biden në qershor dhe më pas në debatin e tij të dytë kundër Harris.

“Nuk do të ketë debat të tretë!” përfundoi ai postimin.

Zëvendëspresidentja amerikane, Harris po zhvillon dy mitingje në Karolinën e Veriut, ndërsa ish-presidenti Trump do të flasë në Arizona, një shtet i luhatshëm në kufirin SHBA-Meksikë, i cili do të luajë një rol vendimtar në zgjedhjet e nëntorit, pasi emigracioni mbetet një çështje kryesore në garë./ BBC

/rtsh.al/