Organizata Botërore e Shëndetësisë (OBSH) bëri thirrje të premten për një “pauzë humanitare” në Gaza për të kryer një fushatë masive vaksinimi kundër poliomielitit.

Në një deklaratë të përbashkët me Fondin e Kombeve të Bashkuara për Fëmijët (UNICEF), OBSH tha se ”pushimet shtatëditore në luftimet midis Izraelit dhe grupit militant palestinez Hamas do të lejojnë fëmijët dhe familjet të arrijnë në mënyrë të sigurtë objektet shëndetësore”.

Autoritetet po planifikojnë të vaksinojnë më shumë se 640 000 fëmijë në territor në dy raunde midis fundit të gushtit dhe shtatorit.

“Pa pauzat humanitare, zbatimi i fushatës nuk do të jetë i mundur”, theksohet në deklaratën e OBSH-së.

OBSH tha se ”fushata ishte e nevojshme urgjentisht pasi tre fëmijë në Gaza zhvilluan simptoma të paralizës, një shenjë e zakonshme e infeksionit të poliomielitit”.

Poliovirusi, i cili transmetohet përmes kontaminimit fekal dhe oral, është zbuluar në ujërat e zeza javët e fundit, megjithëse ende nuk është konfirmuar asnjë rast.

/ rtsh.al /