Bankat e mëdha, mediat dhe linjat ajrore po vuajnë aktualisht ndërprerje të mëdha të IT. Problemet me linjat ajrore janë hasur në aeroportin e Sidneit, ku United Airlines ka ndaluar fluturimet dhe platforma e grupit të Bursës së Londrës ka pësuar ndërprerje.

Disa aeroporte dhe linja ajrore kanë raportuar probleme me sistemet e tyre të IT, ku ndërprerje janë konstatuar në aeroportin e Berlinit në të cilin ka pasur  vonesa për shkak të ‘defekteve teknike’.

Gjithashtu, në Spanjë janë raportuar “incidente” në të gjitha aeroportet e vendit.

“Ne po punojmë për ta zgjidhur sa më shpejt të jetë e mundur. Ndërkohë, operacionet po vazhdojnë me sisteme manuale”, shpjegon operatori spanjoll i aeroportit.

Një kompani e madhe e trenave ka paralajmëruar pasagjerët të presin pasi ka probleme me sistemin e IT-s.

Të katër markat e Govia Thameslink Railway – Southern, Thameslink, Gatwick Express dhe Great Northern – postuan në mediat sociale arsyetimin se  “aktualisht jemi duke përjetuar probleme me IT-në në të gjithë rrjetin tonë”. 

“Ekipet tona të Teknologjisë po hetojnë në mënyrë aktive për të përcaktuar shkakun rrënjësor të problemit. Ne nuk jemi në gjendje të aksesojmë diagramet e shoferëve në vende të caktuara, duke çuar në anulime të mundshme me njoftime të shkurtra, veçanërisht në rrjetet Thameslink dhe Great Northern.

Për më tepër, sisteme të tjera kyçe, duke përfshirë platformat tona të informacionit për klientët në kohë reale, janë gjithashtu të prekura. Ne do të ofrojmë përditësime shtesë kur të kemi mundësi.

Ndërkohë, ju lutemi kontrolloni rregullisht udhëtimin tuaj përpara se të udhëtoni”, theksohet në njoftim.

Ndërkaq, Microsoft ka bërë të ditur se po ndërmerr veprime për të zgjidhur problemet e shërbimit ndërsa thekson se ndërprerja filloi rreth orës 18:00 ET të enjten.

Kompania sqaron se po heton çështjet me shërbimet cloud në SHBA dhe çështjet që ndikon në disa nga aplikacionet dhe shërbimet e saj.

/rtsh.al/