Koreja e Veriut ka kryer një provë të re ushtarake, duke lëshuar një raketë strategjike lundrimi të pajisur me një kokë luftarake shpërndarëse, njoftuan mediat shtetërore të vendit.

Sipas Agjencisë Qendrore Koreane të Lajmeve (KCNA), testi u zhvillua të hënën dhe kishte për qëllim verifikimin e aftësive luftarake të sistemit raketor si dhe efektivitetit të kokës së tij shpërndarëse.

Mediat shtetërore të Koresë së Veriut pretenduan se koka luftarake është “e aftë të shndërrojë në hi një sipërfaqe të synuar prej 5 deri në 6 hektarësh falë fuqisë së saj maksimale me dendësi të lartë”. Megjithatë, këto pretendime nuk kanë mundur të verifikohen në mënyrë të pavarur.

Testi vjen vetëm pak ditë pasi Pheniani njoftoi provën e një bombe thërrmuese, e cila sipas autoriteteve mund të montohet në raketa balistike taktike, duke ngritur shqetësime të reja për zhvillimin e arsenalit ushtarak të vendit.

Koreja e Veriut vijon të investojë në avancimin e programeve të saj raketore dhe bërthamore, pavarësisht sanksioneve ndërkombëtare. Disa rezoluta të Këshillit të Sigurimit të Kombeve të Bashkuara i ndalojnë Phenianit testimin dhe lëshimin e raketave balistike, për shkak të rrezikut që paraqesin për sigurinë rajonale dhe ndërkombëtare.

Testi i fundit pritet të shtojë tensionet në Gadishullin Korean, mes shqetësimeve të vazhdueshme të vendeve fqinje dhe komunitetit ndërkombëtar mbi zhvillimet ushtarake të regjimit të Kim Jong Un.

/rtsh.al/