Agjencia e Kombeve të Bashkuara për Ndihmën dhe Punën për Refugjatët Palestinë në Lindjen e Afërt (UNRWA) ka bërë të ditur se rreth 250 mijë njerëz kërkojnë strehim në zonën e evakuimit – më shumë se 10% e popullsisë së Gazës prej 2.3 milionë banorësh.

Urdhri i evakuimit, i cili u postua në mediat sociale të hënën, përfshin gjithashtu lokalitete aty pranë duke përfshirë al-Qarara dhe Bani Suhaila.

IDF tha pasi u njoftua urdhri se pacientëve dhe ofruesve të kujdesit shëndetësor në Spitalin Evropian, objekti më i madh mjekësor në Gaza, nuk u kërkohet të evakuohen, por drejtori i spitalit i tha Associated Press se shumica tashmë ishin zhvendosur.

“Stafi i spitalit dhe pacientët vendosën të evakuohen tashmë. Ne lutemi që spitali evropian i Gazës do të kursehet, nuk do të dëmtohet”, tha Rik Peeperkorn, përfaqësues i Organizatës Botërore të Shëndetësisë për territoret e pushtuara palestineze, në një konferencë për shtyp.

Që kur Izraeli filloi sulmin e tij në Gaza dhe bllokadën totale ndaj ndihmave humanitare në hakmarrje për sulmin e udhëhequr nga Hamasi në tetor, IDF ka sulmuar spitalet në të gjithë enklavën, edhe pse ato kanë shërbyer si strehimore për njerëzit e zhvendosur me forcë.

IDF ka urdhëruar evakuime nga vende të ndryshme duke përfshirë Gazën veriore dhe qytetin jugor të Rafahut – vetëm për të bombarduar të ashtuquajturat zona “të sigurta” pas zhvendosjes së njerëzve.

Në fund të majit, të paktën 46 njerëz u vranë kur Izraeli bombardoi një kamp tende në një “zonë humanitare” në Rafah, pasi filloi një pushtim tokësor në shkallë të plotë të qytetit, ku më shumë se një milion njerëz ishin zhvendosur. Të paktën 25 persona u vranë në një sulm tjetër në një kamp në zonë muajin e kaluar.

Sam Rose, një drejtor planifikimi për UNRËA, tha për Al Jazeera se urdhri i fundit i evakuimit vendosi një çerek milion njerëz në një situatë “të tmerrshme, të tmerrshme dhe tepër të vështirë”.

“Kjo do të thotë një tjetër ditë, javë, kapitull mjerimi për këta qindra mijëra njerëz” tha Rose.

“Shumica prej tyre janë zhvendosur disa herë. Disa sapo ishin kthyer nga Rafah ku ishin zhvendosur disa javë më parë… Ata shkojnë pa e ditur saktësisht se ku do të përfundojnë sepse ky urdhër evakuimi u tha njerëzve të shkonin urgjentisht – ata e dinë që nëse nuk dalin brenda 24 orëve, më e keqja do të vijë”, shtoi Rose.

/rtsh.al/