Sekretari i përgjithshëm i OKB-së, António Guterres shprehu shqetësimin se “paligjshmëria totale” në Rripin e Gazës po pengon shpërndarjen e ndihmave humanitare në rajonin e izoluar bregdetar.

Guterres tha se brenda Gazës, “paligjshmëria është totale”, duke e bërë jashtëzakonisht sfiduese shpërndarjen e ndihmave brenda zonës.

Ai vuri në dukje se grabitja e ndihmave dhe kamionëve po e ndërlikonte procesin e shpërndarjes.

“Duhet të ekzistojë një mekanizëm që garanton se ekziston një minimum i ligjit dhe rendit që lejon që shpërndarja të bëhet”, kërkoi Guterres.

Ai rinovoi thirrjen e tij për një armëpushim të menjëhershëm midis Izraelit dhe Hamasit.

Lufta e Gazës u shkaktua nga masakra e më shumë se 1 200 njerëzve nga Hamasi dhe grupet aleate në Izrael më 7 tetor të vitit të kaluar.

Sipas autoritetit shëndetësor të kontrolluar nga Hamasi në Gaza, të paktën 37 431 njerëz janë vrarë dhe 85 653 janë plagosur në Gaza që nga fillimi i luftës.

Shifrat nuk bëjnë dallim mes civilëve dhe luftëtarëve dhe nuk mund të verifikohen në mënyrë të pavarur.

Sipas ATSH

/ rtsh.al /