Ministri i Jashtëm i Polonisë tha se NATO nuk duhet të përjashtojë mundësinë e dërgimit të trupave në Ukrainë dhe se duhet ta mbajë presidentin rus Vladimir Putin në pritje nëse do të merret ndonjëherë një vendim i tillë.

Radek Sikorski i bëri komentet në një intervistë të botuar të martën në të përditshmen Gazeta Wyborcza.

“Nuk duhet të përjashtojmë asnjë opsion. Putini le të hamendësojë se çfarë do të bëjmë ne”, tha Sikorski kur u pyet nëse do të dërgonte trupa polake në Ukrainë.

Sikorski tha se ai ka shkuar në Ukrainë me familjen e tij në të kaluarën për të ofruar ndihma humanitare.

Por një zëdhënës i Ministrisë së Mbrojtjes së Polonisë, Janusz Sejmej, u tha mediave polake të martën se ai “nuk kishte njohuri për këtë” kur u pyet për një raport në revistën gjermane Der Spiegel që sugjeronte se Polonia mund të dërgonte trupa në Ukrainë.

Ideja për dërgimin e ushtarëve të huaj në Ukrainë, e cila po lufton me agresionin ushtarak rus, u shfaq në fillim të këtij viti në Francë, por asnjë vend, përfshirë edhe Poloninë, nuk e ka pranuar publikisht atë.

Polonia mbështet Ukrainën fqinje politikisht duke ofruar pajisje ushtarake dhe ndihmë humanitare.