Autoritetet e drejtësisë në Brazil kanë urdhëruar arrestimin e zyrtarëve të lartë publikë pas rebelimit ndaj ndërtesave qeveritare në Brasília. Sipas mediave braziliane, një zyrtar, ish-komandant i policisë ushtarake, është arrestuar gjithashtu.  

Sipas zyrës së Prokurorit të Përgjithshëm të Brazilit, mes zyrtarëve të vendosur në pranga është edhe ish-shefi i sigurisë publike të Brasília-s, Anderson Torres dhe të tjerë “përgjegjës për veprimet dhe mosveprimet” që çuan në trazirat e fundit. Ndërkaq, Torres mohon çdo rol në trazirat.

Koloneli Fábio Augusto, komandanti i policisë, u shkarkua nga detyra pasi mbështetësit e ish-presidentit Jair Bolsonaro sulmuan Kongresin, pallatin presidencial dhe Gjykatën e Lartë, transmeton BBC. 

Trazirat erdhën një javë pasi presidenti Luiz Inácio Lula da Silva, i njohur gjerësisht si Lula, u betua në këtë post. Skenat dramatike panë mijëra protestues, disa të veshur me fanella të verdha të futbollit të Brazilit dhe duke valëvitur flamuj, pushtuan policinë dhe plaçkitën zemrën e shtetit brazilian. Nga rreth 1,500 personat e arrestuar, zyrtarët thonë se gati 600 persona janë dërguar në objekte të tjera, ku pritet të njihen me akuzat zyrtare./rtsh.al/