Një agjent i Byrosë Federale të Hetimit (FBI) është arrestuar nga autoritetet amerikane nën akuzën për vjedhjen e më shumë se 900,000 dollarëve në kriptomonedha nga llogaritë e sekuestruara dhe të monitoruara gjatë një hetimi zyrtar. Ngjarja ka tronditur agjencinë ligjzbatuese, ndërsa detajet e çështjes janë bërë publike pas raportimeve të rrjetit mediatik CNN.

Frustrimi profesional dhe aksesimi i llogarive

Zyrtari i arrestuar është identifikuar si Patrick Steven Yaroch, i cili ishte pjesë e një ekipi të sigurisë kombëtare të ngarkuar me hetimin e aktiviteteve të një shteti armiqësor. Përmes pozicionit dhe privilegjeve të hyrjes në sistemet e brendshme të FBI-së, Yaroch arriti të transferonte fondet e bllokuara drejt llogarisë së tij personale.

I marrë në pyetje, agjenti e arsyetoi veprimin e tij me pengesat burokratike gjatë punës operacionale.

“Isha i frustruar me hetimin që po kryenim dhe që nuk isha në gjendje të ndërmerrja veprime më vendimtare për të parandaluar një individ të paidentifikuar të hynte në llogari.”, tha ai.

Reagimi i institucionit ishte i menjëhershëm sapo u identifikua transferta e dyshimtë brenda rrjetit.

“Sapo FBI u njoftua për këto akuza, ne ndërmorëm veprime të menjëhershme, filluam një hetim dhe në fund ekzekutuam një urdhër arresti javën e kaluar.”, thuhet në njoftim.

Planet e arratisjes dhe pyetjet me Inteligjencën Artificiale

Hetimet zbuluan se veprimi i agjentit ishte i planifikuar. Një muaj përpara se të vihej në pranga, 37-vjeçari Yaroch kishte përdorur platformën e inteligjencës artificiale ChatGPT për të kërkuar mënyra për t’iu shmangur drejtësisë amerikane dhe për të nisur një jetë të re jashtë vendit.

Yaroch kishte kërkuar këshilla se ku mund të zhvendosej me një shumë prej rreth 1 milion dollarësh me qëllim që të merrte nënshtetësinë e një vendi të Bashkimit Evropian.

Përgjigjja e sistemit sugjeronte rajone si Cilento në Itali apo zonën Dão në Portugali, si opsione të favorshme për një stil jetese më të qetë dhe të fokusuar te bujqësia apo vreshtaria.

Planet e agjentit u ndërprenë pas ndërhyrjes së agjencisë, ndërsa ndaj tij tanimë rëndojnë akuza të rënda për vjedhje të pasurisë shtetërore dhe keqpërdorim të detyrës zyrtare.

/rtsh.al/