Policia australiane e ka konsideruar si akt terrorist sulmin e së hënës në një kishë në Sidney teksa u arrestua një djalë 16-vjeç. 

Ai akuzohet se sulmoi me thikë peshkopin, një prift dhe disa besimtarë gjatë meshës në kishën Asirian Christ. Të sulmuarit pësuan lëndime por janë jashtë rrezikut për jetën.

Sulmi u kap edhe në transmetim të drejtpërdrejtë të kishës. Hetimet janë në zhvillim e sipër por policia thotë se është e bindur se bëhet fjalë për një rast të ekstremizmit fetar.

Autoritetet kanë refuzuar vazhdimisht të deklarojnë besimin fetar të agresorit. Kisha e ka emëruar priftin At Isaac Royel dhe peshkopin Mar Mari Emmanuel. I shuguruar në vitin 2011, Peshkopi Emmanuel shihet si një figurë popullore dhe e diskutueshme dhe predikimet e tij marrin miliona shikime në mediat sociale.

Kur videot e sulmit u bënë virale në internet turma të mëdha njerëzish kërkonin hakmarrje. Ata u përleshën dhunshëm me policinë, e cila po ruante kishën ku agresori po mjekohej nga urgjenca.

Dy oficerë u plagosën, njëri me nofullën e thyer pasi u godit me tulla dhe u shkatërruan 10 makina policie.

Kryeministri Anthony Albanese ka thirrur një mbledhje urgjente të agjencive të sigurisë kombëtare, duke e cilësuar sulmin si tejet shqetësues.

“Ne jemi një komb paqedashës… Nuk ka vend për ekstremizëm të dhunshëm. Në përpjekje për të shuar dhunën e mëtejshme, ai kërkoi që njerëzit të mos e marrin ligjin në duart e tyre”, tha Albanese. 

/rtsh.al/