Akademiku Nathan Cofnas, i cili ngriti akuza për plagjiaturë ndaj profesorit Jason Arday përpara vdekjes së tij, është pezulluar nga Universiteti i Gentit në Belgjikë.

Arday, 41 vjeç, dha dorëheqjen këtë muaj nga posti i tij në Universitetin e Kembrixhit, pas publikimit të akuzave të Cofnas për plagjiaturë. Pretendimet nuk u provuan përmes ndonjë hetimi formal, por shkaktuan debate mbi arritjet akademike të Arday.

Çështja ka shkaktuar kritika të forta ndaj mënyrës se si Kembrixhi e trajtoi situatën, por edhe ndaj mënyrës se si disa media raportuan për të. Kancelari i universitetit, Chris Smith, e cilësoi mbulimin mediatik si një “furi raciste”.

Arday, i cili në vitin 2023 u bë profesori i parë me ngjyrë më i ri në historinë e Kembrixhit, u gjet i pajetë të premten në Battersea, në jug të Londrës.

Cofnas, një studiues postdoktoral në Departamentin e Filozofisë dhe Shkencave Morale në Universitetin e Gentit, njoftoi në rrjetin social X se ishte vënë nën hetim nga universiteti për diskriminim ndaj Arday. Më pas ai deklaroi se ishte pezulluar dhe se besonte se mund të shkarkohej.

Universiteti i Gentit konfirmoi pezullimin, duke deklaruar se ishte “i tronditur” nga vdekja e Arday dhe se ngjarja duhet të shërbejë si një moment reflektimi. Institucioni theksoi gjithashtu se kundërshton diskriminimin, urrejtjen dhe racizmin.

Në një deklaratë të përbashkët, rektorja Petra De Sutter dhe zv.rektori Herwig Reynaert thanë se universiteti i jep rëndësi lirisë akademike dhe debatit të hapur, edhe kur qëndrimet janë kontroverse, por nënvizuan se kjo liri “nuk është e pakufizuar”.

Sipas drejtuesve të universitetit, liria akademike shoqërohet me përgjegjësi dhe mund të kufizohet kur është e nevojshme për mbrojtjen e të drejtave të të tjerëve. Për këtë arsye, universiteti tha se i ka marrë “shumë seriozisht” deklaratat e fundit publike të studiuesit në lidhje me rastin Arday.