Prokuroria e Tiranës ka dërguar për gjykim pesë shtetas të Kosovës, të akuzuar për kontrabandë të medikamenteve të paautorizuara.

Ngjarja ndodhi në dhjetor të vitit 2024, kur të akuzuarit  Bekim Zenuni, Ferhat Zenuni, Ardian Ismaili, Andi Grabanica dhe Altin Maqastena mbërritën nga Stambolli në Aeroportin e Rinasit, me 300 mijë euro kesh dhe 14 valixhe me medikamente.

Pas një kontrolli fizik nga Dogana dhe Grupi i Antikontrabandës, u zbulua se në valixhet e tyre ndodheshin mbi 1 milion doza medikamentesh me etiketën “Unified”, me një peshë totale prej 417 kilogramësh. Mallrat u sekuestruan së bashku me shumën e padeklaruar të parave.

Sipas Prokurorisë, këto medikamente konsiderohen “barna” sipas Ligjit për Shërbimin Farmaceutik dhe kërkojnë autorizime specifike nga autoritetet shqiptare për t’u futur dhe shpërndarë në treg. Të gjitha provat tregojnë se veprimi është kryer në bashkëpunim nga të pesë personat e akuzuar.

/rtsh.al/