Një valixhe e lënë e braktisur në trotuar ka ngritur në këmbë forcat e Policisë së Tiranës mbrëmjen e sotme, duke shkaktuar momente paniku dhe pezullim të qarkullimit në një nga zonat e populluara të kryeqytetit.

Sipas informacionit zyrtar nga autoritetet, ngjarja u regjistrua rreth orës 18:30. Salla Operative mori një telefonatë nga qytetarët për një objekt të dyshimtë të lënë në trotuarin e rrugës “Bardhok Biba”. Shërbimet e policisë mbërritën menjëherë në vendngjarje, duke evakuuar kalimtarët dhe duke vendosur perimetrin e sigurisë, siç parashikohet në protokollet standarde për pako të dyshimta.

Për të shmangur çdo rrezik të mundshëm për jetën e qytetarëve, në vendngjarje u kërkua ndërhyrja e forcave xheniere (njësia antieksploziv).

Zgjidhja e “misterit”

Ekspertët xhenierë kryen procedurat e nevojshme për verifikimin dhe hapjen e sigurt të valixhes. Pasi u hap, rezultoi se alarmi ishte tërësisht i rremë: brenda saj nuk kishte asnjë material të rrezikshëm apo lëndë plasëse, por vetëm vegla të zakonshme ndërtimi.

Për të zbardhur plotësisht rrethanat, grupi hetimor sekuestroi dhe këqyri pamjet e kamerave të sigurisë së bizneseve përreth. Nga pamjet filmike u vërtetua se valixhja nuk ishte lënë me qëllim për të shkaktuar panik, por ishte harruar aty aksidentalisht nga disa punëtorë ndërtimi pas përfundimit të orarit të tyre të punës.

Pas këtij verifikimi, policia hoqi kordonin e sigurisë dhe lëvizja në rrugën “Bardhok Biba” iu rikthye normalitetit.

/rtsh.al/