Ish-kampioni i botës në peshën e rëndë, boksieri meksikan Andy Ruiz Jr (33 fitore e 2 humbje) duket në formë dhe gati për t’u rikthyer në ring. Gjatë kohës së pandemisë, boksieri që befasoi botën duke mundur Anthony Joshua, është stërvitur fort dhe duket i transformuar. Qëllimi i tij është të rikthehet sërish në majën e botës.

Ruiz ka humbur mjaft në peshë, duke mos qenë më ai trashaluq, duke shpresuar që në vitin 2021 t’i jepet sërish mundësia të duelojë për titull. “Është një çmim që ia kam vënë syrin, të rikthehem kampion bote si dikur. Do të rikthehem më i fortë se kurrë më parë në ring”, u shpreh Andy Ruiz.

Për momentin nuk ka asnjë shans që Andu Ruiz të duelojë për titujt kampionë bote, pasi Joshua dhe Fury që mbajnë titujt kanë rivalë të tjerë përpara. Ndaj, meksikani, që nuk duelon prej dhjetorit të vitit të kaluar, shpreson që në vitin 2021 të duelojë për titull. Luis Ortiz ose Dillian Whyte janë disa nga rivalët e mundshëm të tij për sfidën e radhës.