Presidenti i Shteteve të Bashkuara, Donald Trump, i ka cilësuar si “fantastike” dhe një shembull të bashkëpunimit të shkëlqyer dypalësh arrestimet e pesë personave të dyshuar për përgatitjen e një sulmi ndaj bazës ajrore ushtarake RAF Fairford në Gloucestershire, Angli.

I pyetur nga gazetarët menjëherë pas zbarkimit me Air Force One në Çikago — ku ndodhet për të marrë pjesë në turneun e golfit President’s Cup — kreu i Shtëpisë së Bardhë konfirmoi se të dyshuarit ishin nën mbikëqyrje prej kohësh nga shërbimet e inteligjencës.

Elogje për inteligjencën dhe bashkëpunimin dypalësh

Trump theksoi se operacioni i përbashkët me autoritetet britanike shmangu një goditje të mundshme ndaj infrastrukturës ushtarake të përdorur nga forcat amerikane dhe ato të Mbretërisë së Bashkuar.

“Ne i kemi vëzhguar ata për një kohë të gjatë dhe më në fund i kapëm. Duke punuar me Britaninë e Madhe, ata bënë një punë të jashtëzakonshme. I kishim nën hetim. Ata synonin të shkaktonin dëme serioze në aeroportet tona.”, tha Donald Trump, President i SHBA-së për rrjetin mediatik Sky News UK.

Pavarësisht pyetjeve të shumta të gazetarëve në pistën e aeroportit, udhëheqësi amerikan nuk pranoi t’u përgjigjej pyetjeve nëse të arrestuarit kishin status emigrantësh apo mbi kombësinë e tyre.

Baza ushtarake në gatishmëri të lartë

Deklarata e Presidentit amerikan vjen menjëherë pas operacionit të ndërmarrë nga Policia e Gloucestershire dhe njësitë ushtarake EOD (anti-bombë), të cilat bllokuan tre furgonë të dyshimtë dhe evakuuan 85 shtëpi në fshatin Whelford pranë bazës. Hetimi zyrtar i ka kaluar tashmë strukturave kombëtare të anti-terrorizmit britanik.

Baza e RAF Fairford mban një peshë kyçe strategjike për SHBA-në në Evropë, pasi shërben si pikë stacionimi për bombarduesit e rëndë strategjikë që përdoren në operacionet ushtarake ndërkombëtare.

/rtsh.al/