Avokati i Popullit, Endri Shabani po merr pjesë në edicionin e dytë të Forumit të Nivelit të Lartë të Këshillit të Evropës, i njohur si “CoE ON Forum”, ku marrin pjesë Ombudsmanët dhe Institucionet Kombëtare për të Drejtat e Njeriut.

Ky aktivitet dyditor zhvillohet në ambientet e Këshillit të Evropës në Strasburg dhe organizohet në bashkëpunim me Gjykatën Evropiane për të Drejtat e Njeriut.

Takimi i këtij viti është pjesë e “Paktit të Ri Demokratik për Evropën” dhe trajton rolin thelbësor të Ombudsmanëve në mbrojtjen e demokracisë.

Disa nga temat kryesore ku po kontribuon delegacioni shqiptar përfshijnë mbrojtjen e proceseve demokratike, ku përfshihet adresimi i ndërhyrjeve të huaja dhe ruajtja e ekuilibrit mes pushteteve.

Liritë themelore, ku përfshihet përforcimi i lidhjes mes të drejtave të njeriut dhe stabilitetit demokratik, me fokus te liria e shprehjes dhe e tubimit.

Si dhe dorcimi i institucioneve, ku përfshihet ndërveprimi i praktikave më të mira për të garantuar që institucionet e pavarura të mbrojnë qytetarët dhe të respektojnë sundimin e ligjit.

Gjatë këtyre dy ditëve, Avokati i Popullit do të zhvillojë takime të nivelit të lartë me përfaqësues të Këshillit të Evropës dhe të Gjykatës Evropiane për të Drejtat e Njeriut (GJEDNJ).

Pjesëmarrja në këtë Forum rikonfirmon angazhimin e Shqipërisë për të harmonizuar standardet kombëtare të mbrojtjes së të drejtave të njeriut me ato evropiane, veçanërisht në një periudhë sfidash globale për demokracinë.

/rtsh.al/