Presidenti i Republikës, Bajram Begaj, zhvilloi sot në Milano një takim me një përfaqësi të arbëreshëve që jetojnë dhe punojnë në zonën e Lombardisë. Gjatë vizitës së tij, Kreu i Shtetit ndaloi në shkollën shqipe “Dora e Pajtimit”, ku vlerësoi kontributin e mësuesve të gjuhës shqipe në ruajtjen e identitetit kombëtar.

Në një postim, Presidenti Begaj shprehu mirënjohjen për përkushtimin e tyre në mbajtjen bashkë të komunitetit shqiptar në Itali dhe në forcimin e lidhjeve me Shqipërinë, përmes përcjelljes së gjuhës amtare, traditave dhe kulturës shqiptare te brezat e rinj.

“Sot, në shkollën shqipe “Dora e Pajtimit” në rajonin e Lombardisë. Mirënjohje për veprimtarët, mësuesit e gjuhës shqipe, që punojnë me zemër për të mbajtur bashkë komunitetin shqiptar në Itali, për të ruajtur lidhjet me Shqipërinë përmes përcjelljes së gjuhës amtare, traditave e kulturës sonë te fëmijët”, shkruan Begaj.

/rtsh.al/