Kryetarja e Kuvendit, Lindita Nikolla, ka reaguar pasi kreu i PD-së, i zgjedhur nga Komisioni i Rithemelimit, Sali Berisha, njoftoi për protestë më 6 dhjetor, në të njëjtën ditë kur në Tiranë do të mbahet edhe samiti BE-Ballkani Perëndimor.

Në një postim në Facebook, Nikolla e konsideron protestën e thirrur prej Berishës si “aventurë”, nëpërmjet së cilës, sipas saj, po përbaltet Shqipëria dhe shqiptarët.

“Si Kryetare e Kuvendit të Shqipërisë, kam respektuar dhe do të vijoj të respektoj opozitën dhe të nxisë aksesin dhe hapësirat e saj në Kuvend dhe në jetën politike. Në drejtimin e Kuvendit të Shqipërisë, në veprimtarinë parlamentare dhe jetën publike nuk kam mbajtur asnjëherë qëndrime të frymëzuara nga përkatësia ime politike e partiake. Por kur vjen puna për dinjitetin e Shqipërisë, nuk mund të hesht!  Me aventurën e 6 dhjetorit,  Sali Berisha nuk sulmon Qeverinë dhe Partinë Socialiste, por përbalt Shqipërinë dhe shqiptarët!”, shkruan Nikolla.

Kryetarja e Kuvendit e akuzon Berishën se po kërkon të vendosë pengesa në rrugën e vendit drejt integrimit europian të vendit dhe se për hallet e tij, nuk kursen as Shqipërinë. Ajo i bën thirrje qytetarëve që të mos i bashkohen protestës së thirrur prej tij.

“Me thirrjet dhe veprimet e veta, Sali Berisha njollos rrënjët dhe identitetin  evropian të shqiptarëve dhe kërkon të vendosë pengesa në rrugëtimin evropian të Shqipërisë! Thirrja ime për qytetarët e Tiranës dhe gjithë Shqipërisë është që ditën e Samitit të BE-së në Tiranë ta shndërrojmë në një ditë feste e përgjegjësie kombëtare! Mos i shkoni pas një njeriu që, në emër të hallit të vet, nën pretekstin e luftës politike kundër Qeverisë, nuk kursen as Shqipërinë!”, përfundon postimin Nikolla.

Në mbledhjen e Kryesisë të premten, Berisha njoftoi mbajtjen e protestës më 6 dhjetor, ndërsa argumentoi se zgjodhën këtë ditë me qëllimin që Evropa të kuptojë problemet reale të shqiptarëve, sipas tij. Ai theksoi se protesta do të jetë paqësore kundër qeverisjes aktuale.

/rtsh.al/