Kryeministri Benjamin Netanjahu ka udhëzuar shefin e Mossad-it, David Barnea, të udhëtojë në Katar për bisedime mbi lirimin e pengjeve të Hamasit.

Netanjahu informoi presidentin e SHBA Joe Biden për vendimin e tij përmes një telefonate.

Të dy udhëheqësit diskutuan marrëveshjen e mundshme për një armëpushim në Gazë dhe lirimin e pengjeve izraelitë të mbajtur nga Hamasi që nga masakra e 7 tetorit.

Zyra e Netanjahut tha në një deklaratë se kryeministri përsëriti parimet për të cilat Izraeli ishte i përkushtuar, kryesisht për t’i dhënë fund luftës vetëm pasi të ishin përmbushur objektivat e saj.

Nga ana e saj, Shtëpia e Bardhë ka deklaruar se Netanjahu falënderoi presidentin për mbështetjen e palëkundur të Izraelit dhe  Biden përsëriti angazhimin e tij për sigurinë e Izraelit, duke përfshirë edhe përballjen e kërcënimit nga Hezbollahu.

Netanjahu vendosi të dërgojë shefin e Mossad-it në negociatat e rinovuara, të cilat konsideroheshin se kishin një shans më të mirë për sukses, përpara se të mblidhej kabineti i sigurisë.

“Duket se ai dëshiron një marrëveshje dhe është akuzuar gabimisht se ka penguar lirimin e pengjeve. Ai miratoi fleksibilitetin në pozicionin e Izraelit gjashtë herë”, ka bërë të ditur Shtëpia e Bardhë. 

Sipas zyrtarit, shqetësimi ishte se konsideratat politike do të prishnin shanset për një marrëveshje, veçanërisht nëse partnerët e koalicionit të ekstremit të djathtë të Netanyahu ia dilnin ta pengonin atë. “Ata duhet të kuptojnë se Hamasi po përdorte opozitën e tyre si mjet në luftë dhe se po luanin në duart e grupit terrorist”, tha ai.

/rtsh.al/