Duke filluar nga ora 16:00 (sipas orës lokale shqiptare), Shtetet e Bashkuara të Amerikës kanë vënë në zbatim bllokadën detare të paralajmëruar ndaj porteve dhe zonave bregdetare të Iranit. Masa, e njoftuar nga administrata e Presidentit Donald Trump, synon të bllokojë aksesin detar në infrastrukturën portuale dhe energjetike iraniane, me shtrirje në Gjirin Persik dhe Gjirin e Omanit.

Sipas raporteve të Komandës Qendrore të SHBA-së (CENTCOM) dhe Operacioneve Tregtare Detare të Mbretërisë së Bashkuar (UKMTO), kufizimet kanë filluar të zbatohen zyrtarisht në orën 14:00 UTC. Direktivat detare specifikojnë se ajo aplikohet në mënyrë të paanshme ndaj anijeve të çdo flamuri që tentojnë të hyjnë ose të dalin nga portet, terminalet e naftës dhe objektet bregdetare iraniane.

Lëvizja e lirë përmes Ngushticës së Hormuzit për destinacione jo-iraniane nuk pengohet. Megjithatë, autoritetet theksojnë se anijet tranzite mund t’i nënshtrohen komunikimeve të drejtuara, procedurave të inspektimit dhe pranisë së shtuar ushtarake.

Mjeteve lundruese ndërkombëtare që ndodheshin tashmë brenda porteve iraniane, u është akorduar një dritare e kufizuar kohore për t’u larguar pa penalizime.

Qëndrimi i administratës amerikane

Përmes një komunikimi zyrtar në platformën “Truth Social”, Presidenti i SHBA-së, Donald Trump, paralajmëroi protokolle të ashpra ushtarake për çdo mjet lundrues iranian që sfidon perimetrin e bllokadës. Ai deklaroi se anijet e shpejta të marinës iraniane do të “eliminohen menjëherë” nëse i afrohen zonës së kufizuar, duke shtuar se do të përdoren të njëjtat taktika zjarri që aplikohen ndaj mjeteve të dyshuara për trafik narkotikësh.

Situata e trafikut detar

Të dhënat nga ofruesit e inteligjencës detare dhe satelitore si Lloyd’s List Intelligence, MarineTraffic dhe Kpler tregojnë një ridimensionim të menjëhershëm të lëvizjeve logjistike në rajon. Dhjetëra anije, pjesa më e madhe e operuar nga Irani, raportohen të ankoruara në distancë sigurie nga porti kryesor i Bandar Abbasit.

Agjencia “TankerTrackers” konfirmon stacionimin e dhjetë cisternave të mëdha iraniane jashtë ngushticës, në Gjirin e Omanit. Këto mjete kanë një kapacitet kumulativ prej 21 milionë fuçish.

Para hyrjes në fuqi të bllokadës, platformat gjurmuese regjistruan kalimin e cisternës “Auroura” (e sanksionuar nga SHBA-ja) dhe cisternës me pronësi kineze “New Future”.

Paralelisht, raportohet se një cisternë me dy milionë fuçi naftë iraniane ka mbërritur në Indi, pas një pezullimi të përkohshëm të sanksioneve amerikane muajin e kaluar. Ky pezullim specifik për naftën iraniane në det pritet të skadojë më 19 prill. /rtsh.al/