Ministri i Mbrojtjes i Shqipërisë, Pirro Vengu, zhvilloi të enjten një takim me homologun e tij italian, Guido Crosetto, në kuadër të takimit të ministrave të Mbrojtjes të NATO-s që po mbahet në Bruksel. Ky takim nënvizoi rëndësinë e marrëdhënieve dypalëshe dhe bashkëpunimin e vazhdueshëm mes dy vendeve aleate.

Përmes një postimi në rrjetet sociale, Ministri Crosetto informoi mbi temat e diskutuara gjatë takimit, duke theksuar se dy homologët ndanë pikëpamjet mbi çështje me interes të përbashkët. Bashkëpunimi në sektorin e mbrojtjes ishte në qendër të bisedimeve, me fokus të veçantë te industria e mbrojtjes dhe sektori i sigurisë rajonale.

Ministri italian i Mbrojtjes, Guido Crosetto, theksoi harmoninë e plotë dhe dëshirën e përbashkët për të forcuar një bashkëpunim që tashmë është i fortë dhe thelbësor. “Harmoni e plotë dhe dëshirë e përbashkët për të forcuar një bashkëpunim tashmë të fortë dhe thelbësor për t’u përballur së bashku me sfidat globale,” u shpreh Crosetto, duke theksuar rëndësinë e koordinimit të përbashkët përballë sfidave aktuale gjeopolitike dhe të sigurisë.

Takimi i sotëm shërben si një dëshmi e angazhimit të Shqipërisë dhe Italisë për të thelluar partneritetin e tyre në fushën e mbrojtjes, duke kontribuar në forcimin e sigurisë rajonale dhe atë të Aleancës së Atlantikut të Veriut.

/rtsh.al/