Dy inxhinierë janë vënë në prangat e policisë pasi po ndërtonin pa leje një impiant gazi në pronë publike. Ndërkohë janë shpallur në kërkim pronari dhe administratori i kompanisë, pasi dyshohet të kenë kryer veprat penale “Ndërtimi i paligjshëm”, me qëllim përfitimi, dhe “Pushtimi i tokës”.

Gjatë kontrollit të ushtruar në një subjekt privat (kompani gazi), në Delvinë, u konstatua se kjo kompani po ndërtonte një impiant gazi (TEC) në pronë publike, pa leje ndërtimi dhe zhvillimi nga organet kompetente. Në kërë kuadër, IKMT ka bllokuar punimet në këtë objekt.

Në përfundim të veprimeve të para procedurale, u arrestuan në flagrancë E. M., 31 vjeç, me detyrë përgjegjës i impiantit të gazit, dhe L. M., 53 vjeç, me detyrë përgjegjës i kantierit të ndërtimit, të dy të dyshuar për veprat penale “Ndërtimi i paligjshëm”, me qëllim përfitimi, dhe “Pushtimi i tokës”.

Gjithashtu, u shpallën në kërkim S. M., 56 vjeç, pronari i kompanisë, dhe J. I., 36 vjeç, administratori i kompanisë.

/rtsh.al/