Pas denoncimit të Partisë Demokratike se në fshatin Pekisht, në Elbasan, kishin zbuluar materiale zgjedhore në ambientet e një lokali në pronësi të kryeplakut të fshatit, i cili sipas kryedemokratit njihej si vëzhgues i Partisë Socialiste, Policia e Peqinit ka verifikuar rastin duke proceduar penalisht pronarin e biznesit.

Policia në bashkëpunim me Prokurorinë e Elbasanit kanë gjetur dhe sekuestruar në lokalin e një personi 10 fletë të ngjashme me fletët e votimit, të paplotësuara, të dyshuara të falsifikuara, si dhe një listë emërore e zgjedhësve.

Më tej, gjatë kontrollit në banesën e këtij personi, janë gjetur një pushkë e vjetër trofe dhe një pistoletë zhurmuese (sportive).

“Në vijim të veprimeve për rastin, specialistët për Hetimin e Krimeve të Komisariatit të Policisë Peqin referuan materialet procedurale në Prokurori, ku nisi procedimi penal për shtetasin D. B., për veprat penale “Falsifikimi i materialit zgjedhor dhe rezultateve të zgjedhjeve” dhe “Prodhimi dhe mbajtja pa leje e armëve të gjuetisë dhe sportive”.

Materialet procedurale iu referuan Prokurorisë, për veprime të mëtejshme hetimore”, thuhet në njoftim.

/rtsh.al/