Qeveria Federale Gjermane po punon aktualisht për një vendim emergjent për të furnizuar Ukrainën me sisteme të reja të mbrojtjes ajrore dhe një numër të mjaftueshëm raketash interceptuese.

Gazeta gjermane Bild shkruan se Berlini tani po pret konfirmim nga Sekretari i Mbrojtjes i SHBA-së Pete Hegseth për sigurimin e dy sistemeve të mbrojtjes ajrore Patriot, të cilat Gjermania do t’i financojë për Ukrainën.

Ndërkohë bëhet e ditur se Gjermania e ka paraqitur kërkesën disa javë më parë.

“Kiev ishte përpjekur më kot të blinte sisteme Patriot direkt nga Shtetet e Bashkuara dhe më pas iu drejtua qeverisë gjermane”, shkruan Bild.

Pasi Shtetet e Bashkuara njoftuan ndalimin e disa dërgesave të armëve në Ukrainë, Berlini ka frikë se Uashingtoni mund të refuzojë gjithashtu kërkesën gjermane për dy sisteme Patriot.

Bild raportoi se çështja ishte diskutuar në mbledhjen e kabinetit të së mërkurës, gjatë së cilës “u bë e qartë se dërgesat e anuluara nga SHBA-ja nuk mund të kompensohen”.

“Megjithatë, Gjermania dhe aleatët e tjerë tani duan të përpiqen t’i sigurojnë Ukrainës të paktën sisteme Patriot nga stoqet e tyre”, raporton Bild.

Ndërkaq presidenti Volodymyr Zelensky synon të ngrejë çështjen e ruajtjes së furnizimit me armë dhe municione nga Shtetet e Bashkuara në Ukrainë, përfshirë raketat PAC-3 për sistemet Patriot, në një bisedë me Presidentin e SHBA-së Donald Trump më 4 korrik ose në ditët në vijim.

Zelensky tha se Ukraina po sqaron detajet e furnizimeve të ndihmës ushtarake me Shtetet e Bashkuara në nivel pune pas raportimeve për një pezullim të furnizimeve.

/rtsh.al/