Detaje të reja kanë dalë në dritë lidhur me vrasjen e 45-vjeçarit Valter Lleshi, mëngjesin e së hënës në rrugën Reps–Spaç.

Sipas burimeve hetimore, ai doli nga banesa e tij në Rrëshen rreth orës 06:00  dhe së bashku me një koleg u nis drejt kompanisë së bazaltit në Reps, ku punonte.

Vetëm 2 kilometra nga vendi ku ndodhi vrasja, kolegu zbriti në një lokal, ndërsa Lleshi vijoi lëvizjen i vetëm.

Hetuesit dyshojnë se autorët kanë ndjekur lëvizjet e tij që nga dalja nga banesa dhe pasi janë informuar për itinerarin, i kanë zënë pritë në një kthesë rreth një kilometër larg vendit të punës.

45-vjeçari u qëllua nga afër, duke marrë plagë të shumta në kokë dhe fytyrë. Sipas grupit hetimor, mënyra e ekzekutimit tregon se autorët kishin planifikuar me kujdes atentatin dhe synonin eliminimin e tij pa i lënë mundësi shpëtimi.

Policia ka shoqëruar dhe marrë në pyetje disa persona që mund të kenë dijeni për ngjarjen, ndërsa po vijojnë kontrollet në zonë si dhe po analizohen pamjet e kamerave të sigurisë të bizneseve në Rrëshen dhe përgjatë Rrugës së Kombit, në përpjekje për të identifikuar autorët dhe lëvizjet e tyre para e pas krimit.

Një nga pistat që po verifikohet lidhet me dyshimet se viktima mund të ketë pasur dijeni ose përfshirje në vrasjen e Anton Kelit në vitin 2020 në Rrëshen.

Edhe pse ai ishte marrë në pyetje për atë ngjarje, organet e drejtësisë nuk arritën të siguronin prova që ta implikonin.

RTSH