Dega e Partisë Demokratike në Lezhë ka reaguar zyrtarisht përmes një deklarate për mediat, duke dënuar aktin e dhunës të ushtruar ndaj Sokol Tomës, ish-funksionar i kësaj force politike. Për PD-në e Lezhës, kjo ngjarje nuk është vetëm një sulm individual, por një tregues i përkeqësimit të sigurisë publike në vend.

Në deklaratën e saj, dega lokale e PD-së e cilësoi ngjarjen si të papranueshme për një shoqëri demokratike. Sipas forcës politike, rasti i Sokol Tomës shërben si një dëshmi e gjendjes së rëndë ku ndodhet rendi, si në nivel lokal, ashtu edhe në atë kombëtar.

“Kjo ngjarje është tronditëse dhe e papranueshme. Ajo përbën një tjetër këmbanë alarmi për gjendjen e rëndë të rendit dhe sigurisë publike në Lezhë dhe të gjithë vendin,” thuhet në reagimin e Partisë Demokratike.

Partia Demokratike i ka drejtuar një kërkesë Policisë së Shtetit dhe Prokurorisë për të vepruar me shpejtësi dhe paanësi. Sipas tyre, zbardhja e plotë e ngjarjes dhe ndëshkimi i autorëve janë hapat e vetëm për të rikthyer besimin e qytetarëve te shteti.

Në mbyllje të deklaratës, dega e PD-së shprehu mbështetjen e plotë për Sokol Tomën dhe familjen e tij, duke i uruar shërim të shpejtë.

/rtsh.al/