Reforma thelbësore e ndërmarrë nga qeveria për sistemin e inspektimeve ka hedhur sot një hap vendimtar drejt zbatimit praktik. Me qëllim përmirësimin e funksionimit dhe rritjen e besimit të publikut e biznesit, ka nisur zyrtarisht faza e digjitalizimit të plotë të këtij procesi, i mbështetur në ndryshimet e fundit të ligjit.

Ky sistem i ri inovativ transformon rrënjësisht mënyrën se si kryhen kontrollet shtetërore. Ai mundëson tashmë realizimin e inspektimeve në distancë, raportimin elektronik të menjëhershëm, si dhe monitorimin në kohë reale të të gjitha procedurave në terren. Sipas ekspertëve, ky integrim i të dhënave garanton një standardizim të plotë, duke rritur llogaridhënien, transparencën dhe përgjegjshmërinë e trupës inspektuese.

Për të bërë të mundur këtë tranzicion teknologjik, ditën e sotme në ambientet e Inspektoratit të Përgjithshëm u zhvillua ceremonia e dorëzimit të 143 tabletave inteligjente. Këto pajisje do të lehtësojnë punën e përditshme të inspektorëve rajonalë dhe vendorë, duke u ofruar atyre kushtet optimale të nevojshme për një funksionim efikas dhe të pandërprerë të sistemit të ri.

Strukturim dhe koordinim qendror

Nën drejtimin e Inspektoratit të Përgjithshëm, sistemi i ri siguron një bashkëveprim të strukturuar mes inspektorateve qendrore, njësive të specializuara dhe strukturave vendore. Ky riorganizim synon t’i japë fund problematikave të mbartura ndër vite si mbivendosja e inspektimeve te të njëjtat subjekte; konfliktet e kompetencave mes institucioneve të ndryshme; përdorimi joefikas i burimeve njerëzore dhe atyre financiare.

Krahas pajisjeve teknologjike, reforma parashikon krijimin e një databaze të integruar mbarëkombëtare për subjektet e inspektimit, forcimin e kuadrit institucional përmes Bordit të Inspektimeve, si dhe ngritjen profesionale të trupës inspektuese përmes trajnimeve, certifikimeve dhe standardeve të unifikuara.

Mesazhi i Kryeinspektorit

I pranishëm në këtë aktivitet, Inspektori i Përgjithshëm, Dashnor Sula, theksoi rëndësinë e këtyre investimeve si një garanci për mbarëvajtjen e punës, por njëkohësisht kërkoi llogaridhënie maksimale nga strukturat e inspektimit.

“Unë si Inspektor i Përgjithshëm i Republikës së Shqipërisë garantoj të gjitha inspektoratet qendrore, rajonale dhe vendore që çdo inspektor do të punojë në kushte optimale për përmbushjen e detyrës së tyre sipas ligjit 99/2024 për inspektimin. Jam i bindur që çdo inspektor, nga dita e sotme e në vazhdim, do të tregojë përgjegjshmëri dhe integritet për të përmbushur detyrën,” u shpreh Sula.

Ky hap digjitalizimi shënon një zhvillim të rëndësishëm administrativ, duke synuar të ndërtojë një marrëdhënie më të drejtë, të shpejtë dhe pa burokraci të panevojshme midis shtetit dhe subjekteve që i nënshtrohen ligjit.

/rtsh.al/