Autoritetet belge kanë arrestuar një grua kanadeze me origjinë kineze, e cila punonte si praktikante në selinë operative të NATO-s, nën akuzën për spiunazh. 

Zyra e Prokurorit Federal të Belgjikës njoftoi se hetimi nisi pas informacioneve të marra nga shërbimet e sigurisë së NATO-s. Të premten, një ditë pas bastisjes së shtëpisë dhe vendit të punës së saj brenda qendrës së komandës operative të aleancës, e dyshuara u arrestua. 

“Ajo dyshohet për spiunazh në emër të një vendi të tretë dhe për anëtarësim në një organizatë kriminale,” thuhet në deklaratën e prokurorëve. 

Kanadaja dhe Belgjika janë anëtare të NATO-s, aleancë prej 32 vendesh, e cila në vitin 2021 e cilësoi Kinën si një “sfidë sigurie”, krahas kërcënimeve nga Rusia dhe Lindja e Mesme. 

Selia strategjike e bazës së Fuqive Aleate, e njohur si SHAPE, ndodhet në Mons, në jug të Belgjikës, pranë kufirit francez.

Ndërkohë, selia politike e NATO-s është në Bruksel, ku ambasadorët e vendeve anëtare diskutojnë çështje të mbrojtjes, ndërhyrjet me dronë dhe kërcënimet kibernetike.

Në SHAPE, zyrtarët ushtarakë hartojnë dhe komandojnë strategjitë, taktikat dhe operacionet e përbashkëta. 

/rtsh.al/