Ghislaine Maxwell, bashkëpunëtorja e dënuar e financierit të ndjerë Jeffrey Epstein, ka kundërshtuar kërkesën e qeverisë amerikane për të publikuar transkriptet e procedurave të jurisë së madhe që çuan në dënimin e saj.

Këtë e bënë të ditur avokatët e saj, të cilët argumentojnë se një veprim i tillë do të rrezikonte një rigjykim të mundshëm dhe do të shkaktonte “dëmtim të rëndë dhe të pakthyeshëm të reputacionit” të saj.

Kërkesa për publikimin e këtyre materialeve vjen pas udhëzimit të Presidentit Donald Trump ndaj Prokurores së Përgjithshme, Pam Bondi, për të bërë publike dosjet e Epstein dhe Maxwell. Ky hap i Trump vjen në një kohë kur ai po përballet me presion nga mbështetësit dhe kritikët lidhur me mënyrën se si administrata e tij ka trajtuar dokumentet e kësaj çështjeje, veçanërisht pasi Departamenti i Drejtësisë tha se një “listë klientësh” e shumëpërfolur nuk ekzistonte.

Sfondi i çështjes dhe detaje të tjera

Maxwell po vuan një dënim me 20 vjet burg, pasi në vitin 2021 u dënua për ndihmën e Jeffrey Epstein në abuzimin seksual të vajzave adoleshente. Avokatët e saj kanë apeluar dënimin në Gjykatën Supreme të SHBA-së, duke argumentuar se një marrëveshje e vjetër e Epstein me prokurorët federalë në vitin 2007 mbronte edhe bashkëpunëtorët e tij.

Nga ana tjetër, Departamenti i Drejtësisë ka theksuar se publikimi i materialeve të jurisë së madhe është në interesin publik. Megjithatë, ende nuk dihet nëse këto dokumente do të përmbajnë informacion të ri dhe të rëndësishëm.

Javën e kaluar, Maxwell u transferua nga një burg në Florida në një strukturë me siguri më të ulët në Teksas, ndërsa avokatët e saj janë takuar me Zëvendës Prokurorin e Përgjithshëm për të parë nëse ajo kishte informacion mbi persona të tjerë që mund të kenë kryer krime. Reuters

/rtsh.al/